Tað var eftir eina grind, sum varð funnin á Borðoyarvík 2. august 1999, at okkara kendi grindaformaður í Klaksvík Andras Joensen, setti sær fyri at gera eina útrokning av, hvuss stórt virði ein grind hevur fyri samfelagið umroknað í krónum og oyrum.

Útrokningargrundarlagið liggur á hesi heimasíðu undir Grind - Virði av grind - fyri tey, sum ynskja at hyggja nærri at hesum.

Uttan mun til hvussu høgan kiloprís vit seta á grindina, so er talan um stórar upphæddir. Grindin hevur soleiðis framvegis stóran samfelagsligan týdning í okkara landshúsarhaldi.

Taka við árið í ár fyri seg, so sæst, at 674 grindahvalir hava lagt beinini og sum tilsamans vórðu mettir til 5184 skinn, sum tilsamans gevur okkum 388.800 kg av tvøsti og spiki (útroknað eftir, at eitt skinn er 50 kg tvøst og 25 kg av spiki). Síðani hevur Andras valt at brúka ein heilsøluprís á kr. 30,00 fyri kg og kr. 37,00 fyri kg í smásølu. Sjálvt prísurin er lágt settur, so er talan um stóran upphæddir.

Tað er einki í vegin fyri at brúka kr. 100,00 fyri skinnið, sum grindin oftani verður seld fyri á almennum uppboði í eini grind fyri at dekka nakað av uppruddingarútreiðslum og fyri grindaskaðar og tá er talan ikki bert um 96 mill. seinastu árini, men heldur trýfaldað hesa upphæddina.

Halda vit okkum til tølini hjá Andras Joensen, grindaformanni, so er virðið av teimum 674 grindahvalunum, sum higartil hava lagt beinini, kr. 14.385,600 kr í smásølu ella kr. 11.664,00 í heilsøluprísi. (fyrivarni við skinnatalinum í grindini í Sandagerði herfyri, har skinnatalið ikki varð upplýst og tí bert høgt mett til 900).
Taka við seinastu 10 árini frá 2001-2010 (har 2008 var grindaleyst ár), so eru tilsamans 4.286 grindahvalir deyðir og sum tilsamans vórðu mettir til 34.613 skinn.
Bruttovirði í heilsølu fyri 10 árini hava eitt virði av kr. 77.879,250.
Bruttovirði í smásølu 2001-2010 hava givið okkum eitt virði av kr. 96.051,075.
Sum víst omanfyri, so er ikki talan um, at prísurin hevur verið høgt ásettur.
Grindahvalurin hevur tí framvegis ein stóran búskaparligan týdning, umframt ein mentanarligan týdning fyri okkum.

Andras Joensen, grindaformaður í Klaksvík.

www.heimabeiti.fo
mynd frammanfyri: Terji Nielsen.